Erum nú þegar að innheimta gjöld

Við erum nú þegar að innheimta gjöld af ferðamönnum í formi virðisaukaskatts af vörum og þjónustu sem þeir kaupa hér á landi. Það sem hins vegar vantar að gera er að sjá til þess að hluti af þessari skattheimtu skili sér á þá staði þar sem þeir eru innheimtir til að standa straum af gerð stíga, salernisaðstöðu og upplýsingaskilta. Innheimta á aðgangi að ákveðnum ferðamannastöðum hefur í för með sér mikið utanumhald og kostnað.

Ef við ætlum að innheimta sérstakan skatt þá erum svo heppin að búa á eyju þar sem það hlýtur að vera þægilegast að taka gjald við komu til eyjarinnar í höfnum og flugvöllum. Það að hafa fólk til að innheimta á hverjum stað fyrir sig mun aldrei skila sér nema fyrir rekstrinum sjálfum og varla það.

Þá er umhugsunarefni hvort ekki ætti að afnema endurgreiðslu á virðisaukaskatti. Það hefur einnig verið skoðun mín að það sé mjög ósanngjarnt að Íslendingar sem koma til landsins þurfi ekki að greiða gjöld af þeirri vöru sem þeir kaupa erlendis. Hvaða réttlæti er í því að þeir sem hafa ekki efni á því að fara til útlanda þurfi að borga skatta og gjöld af innfluttri vöru meðan þeir sem flakka á milli landa þurfa þess ekki?

 

 

Gjaldtaka á ferðamenn skoðuð